Nua: Suaitheantais do chúrsaí ar líne
21st January 2026
Tá suaitheantais dhigiteacha ar fáil anois do rannpháirtithe cúrsa ar líne a d’éirigh leo cúrsa téarma 2025/6 a chríochnú. Tá teastas críochnaithe digiteach (PDF) ar fáil cheana féin do rannpháirtithe i ndiaidh dóibh an cúrsa a chríochnú agus is giuirléid chomhlántach é an suaitheantas.
Úsáideann múinteoirí suaitheantais chun cur lena gclú gairmiúil, chun tuilleadh faisnéise a chur ar fáil i dtaobh cúrsa atá críochnaithe acu agus chun an CV acu a fheabhsú. Bíonn siad áisiúil don úsáideoir le húsáid leis na meáin shóisialta agus i dtimpeallachtaí digiteacha eile mar gheall ar a n-inaistritheacht agus a n-ilúsáidteacht. Is dóigh linn go mbeidh siad ina mbreiseanna úsáideacha lenár gcúrsaí do rannpháirtithe.
Céard is suaitheantas digiteach ann go díreach?
Is dintiúr digiteach é suaitheantas digiteach atá slán, inaistrithe agus inroinnte. De ghnáth, is íomhá atá ann ina bhfuil meiteashonraí ‘daingnithe’ leis an bhfaisnéis faoi dhintiúir an tsuaitheantais. I measc ‘dhintiúir’ an tsuaitheantais tá, mar shampla, cé a d’eisigh é, cad chuige agus cé chomh fada is atá sé bailí.
D’fhéadfadh suaitheantas scileanna nó inniúlacht a baineadh amach, nó críochnú tascanna foghlama ar leith, lena n-áirítear críochnú cúrsa, a léiriú.
Léirítear críochnú cúrsa le suaitheantais chúrsaí ar líne de chuid Oide, Teicneolaíocht san Oideachas agus tá siad bailí ar feadh beagnach trí bliana ón dáta eisiúna. Tá formáid ‘suaitheantas oscailte’ acu. Ciallaíonn sé sin go bhfuil sonraíocht shainithe acu, atá infhíoraithe, inroinnte, agus ina bhfuil faisnéis an chúrsa – lena n-áirítear an méid a rinne an faighteoir chun an suaitheantas a bhaint amach.
An féidir liom suaitheantais a íoslódáil agus a chomhroinnt?
Is féidir le rannpháirtithe suaitheantais a íoslódáil agus iad a chur lena ‘mála droma’ seachtrach suaitheantas féin. Is féidir leat suaitheantais a bhailiú ó gach foinse oideachais agus iad a chomhroinnt le comhghleacaithe, le cláir oideachais eile agus le fostóirí amach anseo. Is féidir leat iad a thaispeáint ar chuntais meán sóisialta chun críche iad a chomhroinnt le daoine eile.
Cuirtear faisnéis ar leith ar fáil i gCeisteanna Coitianta do rannpháirtithe cúrsa maidir lenár n-ardán foghlama do chúrsaí ar líne faoin gcaoi chun ár suaitheantais a íoslódáil agus chun iad a uaslódáil nó a shábháil i mála droma seachtrach.
Conas is féidir liom suaitheantas a fháil le haghaidh mo chúrsaí ar líne?
Is féidir suaitheantas a fháil anois chomh maith sna cúrsaí reatha ina mbaineann rannpháirtithe teastas críochnaithe amach, lena dtaispeántar gur críochnaíodh an cúrsa. Eisítear an suaitheantas go huathoibríoch ar ríomhphost nuair a chomhlíontar critéir chríochnaithe an chúrsa, agus eisítear é beagnach ag an am céanna le teastas an chúrsa.
D’eisíomar suaitheantais go cúlghabhálach do rannpháirtithe a chríochnaigh cúrsa 2025/2026 roimh Eanáir 2026.
